SPAK i ka kërkuar Kuvendit që t’i heqë imunitetin deputetit Alqi Bllako, si i përfshirë në aferën e inceneratorëve.
Ndërkohë që kreu i grupit të PS Taulant Balla në një komunikim për mediat foli edhe për aferën e inceneratorëve dhe kërkesën e SPAK për të arrestuar deputetin Alqi Bllako.
Balla u shpreh se PS ka vendosur një vijë të kuqe dhe si rrjedhojë nuk bëhet mburojë për askënd që e kalon atë. Në këtë mënyrë kreu i grupit të PS Taulant Balla la të nënkuptohej se Bllako në sfidën për të dalë i pafajshëm, nuk do të ketë në krah partinë.
“Një gjë duhet të jetë e qartë , së pari brenda PS , PS ka vendosur një vijë të kuqe me këdo sapo ndaj një përfaqësues PS drejtësia kërkon ose vendos një masë sigurie apo sjell në Kuvend një kërkesë për hetime, vija e kuqe është që PS nuk është mburojë për askënd. Kjo do jetë për këdo dhe ne do mbajmë po këtë qëndrim”, tha Balla.
Keni pasur komunikim me Bllakon dhe a mendoni se duhet të japë dorëheqjen?
Balla: PS nuk do jetë zyrë avokatore për askënd që vendoset në përballje me drejtësinë. kryetarja e Kuvendit ka vendosur thirrjen dhe nesër mblidhet Këshilli për Mandatet dhe është vënë në dijeni edhe Alqi Bllako dhe procedura do vijojë pa asnjë vonesë. Drejtësia duhet të bëjë detyrën pa pengesë. Do kërkoja që të keni durim deri sa Kuvendi të vijojë procedurën.
Keni komunikuar me Bllakon?
Balla: Në cilësinë e kryetarit ë grupit parlamentar, kam komunikuar , por edhe me kryetaren e Kuvendit.
PD ka kërkuar të mos pengoni procesin?
Balla: Do ju ftoja të shihni se çfarë standardi ka pasur PS në këto raste. Nuk ka asnjë vonesë gjithçka do të ecë në bazë të procedurave. Nuk ka asnjë pengesë për të çuar përpara një arritja që Shqipëria tashmë e ka, Reforma në Drejtësi.
