Kryebashkiaku i Rrogozhinës, Edison Memolla, është paraqitur ditën e premte në Gjykatën e Posaçme Kundër Korrupsionit dhe Krimit të Organizuar, ku Prokuroria e Posaçme ka kërkuar dënimin e tij me 1 vit burgim për akuzën e korrupsionit në zgjedhje.
Përveç dënimit me burg, SPAK ka kërkuar që Memolla të heqë të drejtën për të ushtruar funksione publike për 5 vitet e ardhshme.
Në hetimet e kryera, Prokuroria ka çuar për gjykim edhe tre persona të tjerë: Ndriçim Tafxhafa, Blerim Xhamani dhe Isuf Tosku, të akuzuar për korrupsion aktiv në zgjedhje.
Akuzat lidhen me një regjistrim audio të publikuar, në të cilin Memolla, kandidat për kryebashkiak, kërkonte që Ndriçim Tafxhafa të mos ndërpriste energjinë elektrike të një abonenti debitor, në këmbim të votës së tij gjatë zgjedhjeve të pjesshme lokale të 6 marsit 2022.
