Pasditen e sotme ish-kreu i PD Lulzim Basha ka reaguar në lidhje me arrestimet e SPAK për inceneratorët dhe kërkesën për heqjen e mandatit të deputetit Alqi Bllako, si i dyshuar në aferën korruptive.
Për Bllakon SPAK ka kërkuar arrestimin e tij.
Në pranga ranë zyrtarë dhe ish-zyrtarë të shtetit, ndërsa një kërkesë i është dërguar Kuvendit për arrestimin e deputetit socialist Alqi Bllako.
Basha publikon një video të Ramës nga inceneratori i Elbasanit dhe thotë se “koka” e grupit kriminal është Edi Rama ndërsa Lefter Koka dhe Alqi Bllako janë bishti i kësaj afere.
Basha: Në vjedhjen e 430 milionë eurove qeveria ka vepruar si një grup i strukturuar kriminal. Lefter Koka dhe Alqi Bllako janë bishti i kësaj afere.
Koka e këtij grupi është Edi Rama, që mbështeti, miratoi dhe mbrojti këtë aferë kriminalo-korruptive, duke sulmuar çdo përfaqësues të PD-së që e denoncoi atë.
Sot SPAK hodhi një tjetër hap për t’u përshëndetur në zbardhjen e kësaj afere. E inkurajoj atë t’i shkojë deri në fund dhe të çojë para drejtësisë të gjithë ata që janë përfshirë në këtë aferë, të cilët tashmë janë faktuar edhe nga Komisioni Hetimor, përfshirë ministra, kryebashkiakë socialistë, sekretarin e përgjithshëm të kryeministrit e deri tek Edi Rama.