Gazetarja Anduena Llabani deklaroi mbrëmjen e sotme se Prokuroria e Posaçme ka marrë katër letërporosi nga jashtë vendit në kuadër të hetimeve që po zhvillon ndaj zv.kryeministres Belinda Balluku.
Duke folur në emision në News 24, Llabani tha se letërporositë kanë ardhur nga disa shtete, mes tyre Zvicra dhe Izraeli, dhe se lidhen me shuma të konsiderueshme parash të dyshuara në emër të Ballukut.
Sipas saj, nga verifikimet e kryera rezulton se rreth 20 milionë dollarë janë bllokuar në llogari bankare që figurojnë në emër të zv.kryeministres. Llabani shtoi se në këtë çështje nuk po hetohet vetëm Balluku, por edhe një ndërtuese, emrin e së cilës ajo nuk e bëri publik.
“Në hetimet që janë bërë për çështjen Balluku, sot që flasim SPAK ka në dorë 4 letërporosi që kanë ardhur nga jashtë, dhe në këto letërporosi kanë ardhur shuma në emër të saj. Ajo është Zvicra, ajo do të marrë në qafë dhe një ndërtuese. Paratë nuk i kanë vetëm të fortët, i kanë dhe këta zonjat, janë dhe ndërtuesit, kompanitë.
Është dhe Izraeli që SPAK ka në dorë, që janë 20 mln dollarë në emër të Ballukut, ka acounte bankash që figurojnë në emër të zv.kryeministres”, tha Llabani.
Deri më tani, SPAK nuk ka bërë një reagim zyrtar lidhur me këto deklarata apo me ecurinë e letërporosive ndërkombëtare për këtë çështje.
