Gjykata e Posaçme Kundër Korrupsionit dhe Krimit të Organizuar ka vendosur të mbajë në fuqi masën e sigurisë “arrest me burg” për Bujar Shegën, i njohur gjithashtu si Marsel.
Ai u ekstradua nga Italia ditën e enjte, pas dakordësisë së dhënë për transferimin në Shqipëri.
52-vjeçari akuzohet se është pjesë e një organizate kriminale që dyshohet se drejtohet nga Suel Çela në Elbasan.
Gjatë seancës në GJKKO, Shega mohoi të gjitha akuzat e ngritura ndaj tij nga Prokuroria e Posaçme.
Sipas hetimeve, ai dyshohet për përfshirje në trafikun ndërkombëtar të kokainës dhe në pastrimin e produkteve që vijnë nga aktiviteti kriminal.
Kush është Suel Çela?
Emri i Suel Çelës është i lidhur prej vitesh me botën e krimit në Shqipëri. Ai është shpallur në kërkim nga autoritetet në maj të vitit 2022, në kuadër të operacionit “Plumbi i Artë” të ndërmarrë nga SPAK.
Sipas deklarimeve të Nuredin Dumanit, një nga bashkëpunëtorët e drejtësisë në këtë çështje, Suel Çela akuzohet për porositjen e tre atentateve, dy prej të cilave nuk u realizuan, ndërsa një tjetër mbeti në tentativë.
Një nga ngjarjet kryesore për të cilën dyshohet Çela është atentati i dështuar ndaj Elton Kilës, i planifikuar për t’u kryer më 29 mars 2022 nga vetë Dumani.
Përtej këtyre akuzave, Çela ka qenë i përfshirë më herët edhe në raste të tjera kriminale. Ai është dënuar në Itali për trafik droge, por ka arritur t’i shmanget burgimit.
Në Shqipëri, emri i tij u bë publik pas incidentit të shtatorit 2017, të njohur si rasti i “Auditit të zi”, ku një automjet i blinduar u përplas me makinën e zëvendësdrejtorit të policisë në tregun ushqimor të Elbasanit.
Edhe pse prokuroria kërkoi 7 vite burg për të, në nëntor të vitit 2019 Gjykata e Elbasanit e shpalli të pafajshëm për mungesë provash, duke dënuar vetëm një person tjetër të përfshirë në incident.
Pavarësisht se nuk figuron me biznese të regjistruara në emër të tij, Suel Çela konsiderohet si një individ me pasuri të konsiderueshme të padeklaruara.
I ati është një figurë e njohur në botën e biznesit lokal, me ndikim të madh në tregun agro-ushqimor të Elbasanit – zonë ku ndodhi edhe përplasja me policinë disa vite më parë.