SPAK ka dhënë pretencën ndaj kryebashkiakut të Rrogozhinës, Edison Memolla, duke kërkuar dënimin e tij me 1 vit burg për akuzën e “korrupsionit aktiv në zgjedhje” të kryer në bashkëpunim.
Si dënim plotësues, është kërkuar heqja e së drejtës për të ushtruar funksione publike për një periudhë 5-vjeçare.
Sipas SPAK, Memolla, gjatë zgjedhjeve të parakohshme të 6 marsit 2022, në cilësinë e kandidatit për kryetar bashkie, ndikoi te i pandehuri tjetër, Blerim Xhamani, elektriçist pranë FSHU Durrës, dega Rrogozhinë, për të mos ndërprerë energjinë elektrike një abonenti debitor, me qëllim që ky i fundit të votonte në favor të tij.
Seanca e radhës, ku do të bëhet mbrojtja dhe shpallja e vendimit, është caktuar për 10 janar.
Memolla, së bashku me tre persona të tjerë, akuzohet për përfshirje në këtë veprim të jashtëligjshëm që lidhet me zgjedhjet e marsit 2022.
