Prokuroria e Posaçme kundër Korrupsionit dhe Krimit të Organizuar (SPAK) ka reaguar për herë të parë lidhur me hetimet ndaj kryebashkiakut të Tiranës, Erion Veliaj, për akuzat e korrupsionit.
Në një njoftim për A2 CNN, SPAK ka bërë me dije se ekzistojnë të dhëna konkrete për katër akuza të mundshme.
Përmes një komunikate, SPAK sqaron se ka regjistruar Procedimin Penal nr. 27/2024, të bazuar në informacionin e referuar nga Byroja Kombëtare e Hetimit (BKH). Hetimi fillon me akuzën për “Korrupsion pasiv të funksionarëve të lartë shtetërorë ose të zgjedhurve vendorë”, sipas nenit 260 të Kodit Penal.
Hetimi ka nisur pas një kallëzimi të bërë nga shtetasi N.A., dhe ka përfshirë verifikimin e të dhënave dhe administrimin e provave dokumentare.
Deri tani, hetuesit kanë arritur në përfundimin se ekzistojnë të dhëna që lidhen jo vetëm me veprën penale të korrupsionit pasiv, por edhe me akuzat për “Korrupsion aktiv”, “Pastrimin e produkteve të veprës penale” dhe “Mosdeklarimin ose fshehjen e pasurive”. Këto akuza janë regjistruar në Rregjistrin e Njoftimeve të Veprave Penale pranë SPAK.
Hetimet janë ende në fazën e verifikimit, dhe procedimi penal është në vazhdim.
