Në një restorant të Tiranës, dy burra ndajnë një tavolinë dhe një darkë. Njëri është prokurori i SPAK-ut Arben Kraja, tjetri Benet Beci – kryebashkiaku i Shkodrës që duhet të ishte subjekt i hetimeve të tij. Kamerat kapin atë që SPAK-u nuk do ta shohë: një shfaqje të hapur përbuzjeje ndaj drejtësisë, ku hetuesi dhe i hetuari darkojnë bashkë sikur gjithçka të ishte normale.
Por asgjë nuk është normale në historinë e Benet Becit. Ish-drejtori më jetëgjatë i Fondit Shqiptar të Zhvillimit, i lidhur familjarisht me Sali Berishën, sot drejton Shkodrën me të njëjtën arrogancë që dikur drejtonte tenderët e dyshimtë të FSHZH-së.
Vetëm muajin e kaluar, Beci vendosi të kthejë helikopterin Cougar të Forcave Ajrore në taksi private luksoze. Ndërsa ushtria shqiptare vuan nga mungesa e mjeteve ajrore, kryebashkiaku i Shkodrës fluturon mbi Alpe me investitorë austriakë, sikur helikopteri ushtarak të ishte pronë personale.
SPAK ka në dorë prova të forta. Një SMS i kapur nga hetuesit zbulon talljen e hapur të Becit me paratë e taksapaguesve: “500 mijë euro për profesorët e Harvardit, 320 mijë euro për ne me dy klasë shkollë.” Tenderi 834 mijë euro për një “studim strategjik” që kurrë nuk u realizua është vetëm një copëz e korrupsionit sistematik.
Por tragjeditë nën drejtimin e Becit nuk janë vetëm financiare. Kur katër shkodranë – Bashkim dhe Flutura Basha, Hamza Lici dhe Arlind Bushati – u vranë në një përplasje bandash që tronditi qytetin, kryebashkiaku thjesht “u zhduk”. Zhdukja e tij fizike atë ditë u bë simbol i zhdukjes së përgjegjësisë në të gjithë sistemin e drejtësisë.
Hetimet për periudhën e KESH-it kanë zbuluar lidhje të dyshimta përmes komunikimeve në telefonin e gruas së Evis Berberit. Provat grumbullohen, dosjet mbushen, por SPAK-u ka kohë vetëm për darka, jo për hetime.
Darka e Becit me Krajën është një mesazh. Një mesazh që thotë se disa njerëz janë mbi ligjin, se SPAK-u zgjedh se kë do të hetojë e kë do të ftojë në darkë, se drejtësia në Shqipëri ende shitet e blihet mbi pjata.
834 mijë euro për një studim që kurrë nuk u bë. 320 mijë euro për “dy klasë shkollë”. Katër viktima në një qytet pa kryetar. Një helikopter ushtarak i kthyer në taksi luksoze. Dhjetëra tendera të dyshimtë. Dhe në fund, një darkë që tregon se në Shqipëri, drejtësia ende vendoset në tavolina restoranti, jo në sallat e gjyqit.
Ndërsa zgjedhjet afrohen dhe premtimet elektorale të Becit vazhdojnë, një pyetje qëndron: Sa kohë do të vazhdojë SPAK të mbyllë sytë përballë një skandali që po zhvillohet në dritë të diellit? Ndoshta përgjigjen do ta gjejmë në darkën e radhës mes prokurorit dhe të hetuarit të tij!
/gazetareforma.com
