Struktura e Posaçme kundër Korrupsionit dhe Krimit të Organizuar (SPAK) ka thirrur në pyetje kryebashkiakun e Vaut të Dejës, Kristian Shkreli, si person nën hetim për korrupsion aktiv në zgjedhje. Hetimi ndaj Shkrelit shënon një tjetër rast ku një përfaqësues i Partisë Socialiste përfundon në radarët e drejtësisë pas prishjes së marrëdhënieve me qeverinë.
Pak muaj më parë, më 4 maj, gjatë një takimi publik në Shkodër, kryeministri Edi Rama i dërgoi një mesazh të qartë Shkrelit: “Kristian mos më luaj me dy porta!”. Paralajmërimi u dha para kamerave dhe zyrtarëve të tjerë, në një mënyrë që më shumë i ngjante një qortimi publik sesa një sugjerimi politik.
Nuk është hera e parë që një funksionar politik goditet nga SPAK pas një përplasjeje të dukshme me kryeministrin. E njëjta skemë është ndjekur edhe më parë, duke thelluar dyshimet për pavarësinë e kësaj strukture. Në vend që të jetë një mekanizëm i drejtësisë së vërtetë, SPAK duket gjithnjë e më shumë si një instrument i përdorur për të disiplinuar “të pabindurit” brenda sistemit.
Hetimi ndaj Shkrelit vjen vetëm pak kohë pasi atij iu sekuestrua telefoni me vendim të GJKKO-së dhe urdhër të SPAK, ndërkohë që ai kishte fituar mandatin e kryebashkiakut dy vite më parë si kandidat i PS. Zona e Vaut të Dejës është një bastion tradicional i Partisë Social Demokrate të Tom Doshit, një tjetër figurë që shpesh është përplasur me linjën zyrtare të PS-së.
Ndërkohë, shumë figura të tjera politike të njohura për abuzime të rënda vijojnë të mbrohen dhe nuk preken nga asnjë hetim. Rasti i Shkrelit konfirmon edhe më tej dyshimet se drejtësia selektive në Shqipëri është kthyer në normë dhe se “filtrat” e SPAK kalojnë vetëm ata që kanë rënë në sy të keq të pushtetit.
