Gentian Sula është një nga biznesmenët për të cilët Gjykata e Posaçme ka vendosur masën e sigurisë “detyrim paraqitjeje” në lidhje me akuzat për korrupsion aktiv, lidhur me veprimet e tij të dyshuara me Erion Veliajn dhe Ajola Xoxën.
Sipas informacionit të zbardhur nga dosja “Veliaj-Xoxa”, Gentian Sula ka dhënë një deklaratë për prokurorët, ku ka sqaruar se shumën prej 115,000 euro, të gjetur në ambientet e kompanisë Partners Law Shpk, e ka marrë si kapar nga Ajola Xoxa.
Ai ka deklaruar se shumica e kartëmonedhave ishin euro (kryesisht prerje 500 euro), por përfshinin edhe dollarë. Sula ka shtuar se këto shuma i ka mbajtur në shtëpi, pasi i kishte tërhequr nga banka gjatë viteve.
“Në lidhje me shumën prej 115,000 eurosh të gjetura në ambientet e shoqërisë Partners Law Shpk, shtetasi Gentian Sula deklaron se kjo shumë i është dhënë si kapar shtetases Ajola Xoxa. Ai sqaron se kartëmonedhat kanë qenë kryesisht euro (specifikisht prerje 500 euro), por kanë përfshirë edhe dollarë. Shumat monetare ai i ka mbajtur në shtëpi, të tërhequra nga banka ndër vite dhe nga këmbimi valutor pranë pikës “Flamuri” te Libri Universitar. Ai pohon se kishte më shumë se dy vjet që i mbante këto shuma. Për sa u përket bankave ku ka depozituar apo tërhequr para, shtetasi Sula përmend Credins Bank, OTP Bank, dhe Intesa San Paolo Bank, llogaria e kësaj të fundit jo më aktive.
Kur iu prezantua një dokumentacion (distinë që shërben për lidhjen e parasë) me vulën sipër saj të Union Bank, deklaruesi mohoi lidhjen me këtë dokument, duke sqaruar se nuk ka kryer tërheqje pranë kësaj banke. Lidhur me pyetjen nëse ka pasur raste të këmbimeve valutore me destinë, ai konfirmon se mund të ketë qenë rasti në fjalë.
Shtetasi Gentian Sula sqaron se gjatë dorëzimit të shumës monetare në 4 dhjetor, ai ka qenë i vetëm në takim me shtetasen Ajola Xoxa dhe për këtë arsye nuk ka pasur ndonjë person të tretë prezent. Ai shpjegon se kishte planifikuar ta formalizonte procesin me noter, por për shkak të udhëtimit të planifikuar jashtë vendit, nuk kishte kohë ta realizonte.
Lidhur me nxitimin për dorëzimin e shumës, ai deklaron se kjo ishte për shkak të planit të shtetases Ajola Xoxa për të blerë zyra dhe për t’u zhvendosur në ambiente të tjera. Shumat monetare, të futura në një qese, janë dorëzuar në zyrën e saj. Gjithashtu sqaron se nuk ka bërë blerje të tjera cash në vlerë të konsiderueshme.
Për sa i përket kontratës së kaparit ndërmjet tij dhe shtetases Xoxa, në të cilën është përcaktuar shuma prej 220,000 eurosh, shtetasi Gentian Sula sqaron se kontrata kushtëzohej nga procesi i rivlerësimit, për të cilin ata prisnin daljen e një ligji përkatës. Ai deklaron se situata nuk e favorizonte vazhdimin e marrëdhënies dhe se kohët e fundit i ka kërkuar shtetases Ajola Xoxa të revokojë kontratën”, thuhet në dosjen hetimore.
Sipas organit procedues, pas deklarimeve të Gentian Sulës, është evidentuar një akt privat (jo noterial) i përpiluar vetëm një ditë para vendimit të Gjykatës së Posaçme për kontrollin e ambienteve. Ky dokument u paraqit në gjykatë gjatë seancës për heqjen e sekuestros, por nga analiza e tij dhe e prerjeve të kartëmonedhave të gjetura (kryesisht 500 euro, të përziera edhe me USD), si dhe duke marrë parasysh marrëdhënien mes palëve, janë ngritur dyshime të bazuara në prova se këto para nuk kanë qenë pjesë e një kontrate shitblerjeje. Dyshohet se ato kanë qenë në posedim të Ajola Xoxës për një kohë më të gjatë.
Gjithashtu, në momentin e kontrollit, Ajola Xoxa ka deklaruar para hetuesve se shumat e parave vinin nga trashëgimia e babait të saj.
Nga ana tjetër, Gentian Sula ka pranuar para SPAK se ka përfituar fonde publike nga Bashkia e Tiranës. SPAK ka konfirmuar se ai ka marrë disa herë financime për kompaninë “Noa Control”, me firmën e kryebashkiakut Erion Veliaj.
