SPAK ka përfunduar hetimet dhe ka dorëzuar në gjykatë dosjen ndaj ish-ministrit të Shëndetësisë, Ilir Beqaj, së bashku me pesë persona të tjerë të akuzuar.
Beqaj përballet me disa akuza të rënda, përfshirë korrupsionin, fshehjen e pasurisë, shkeljen e barazisë në tendera dhe mashtrimin. Ai u arrestua më 4 korrik 2024 për abuzimet me fondet e Agjencisë Shtetërore të Programimit Strategjik dhe Koordinimit të Ndihmës.
Hetimet ndaj Beqajt nisën pas denoncimeve për keqpërdorimin e fondeve të SASPAC, institucion të cilin ai e drejtonte deri në dorëheqjen e detyruar, pas vendosjes së masave të sigurisë nga GJKKO: “detyrim paraqitje” dhe “ndalim i udhëtimeve jashtë vendit”.
Një nga personat kyç në hetime është Ermal Kurtulaj, i njohur si një nga njerëzit më të besuar të Beqajt, i cili u arrestua së bashku me ish-ministrin dhe një tjetër të pandehur, Alfred Nikollën.
Sipas të dhënave të SPAK, Kurtulaj është dyshuar për përfshirje në skema të pastrimit të parave, ndërsa Beqaj përdorte automjetin e tij për të lëvizur.
Kur u pyet për këtë nga gazetarët, Beqaj deklaroi:
“Nuk di të drejtoj makinën, ndaj lëviz me automjete të tjera. Nuk kam pasur kurrë patentë.”
Një element kyç në hetimet e SPAK është një bisedë mes Beqajt dhe Kurtulajt, ku diskutohet për një faturë që duhej justifikuar. Për të shmangur përfshirjen e tij direkte, Beqaj përdorte telefonin e shoferit të tij, Arben Dani, për të komunikuar.
Nga përgjimet rezulton se Beqaj i kërkonte Kurtulajt të lidhej me Gazmend Prengën, administrator i një restoranti në Tiranë ku Kurtulaj dyshohet se kishte investuar para.
Dyshimet shtohen për përfshirjen edhe të vetë Beqajt në këtë skemë financiare. Në bisedat e përgjuara, Kurtulaj i kërkon Prengës një bllok shënimesh që përmbante detaje mbi investimet dhe shumat e përdorura, duke lënë të kuptohet se Beqaj kishte interesa financiare në këtë biznes.
Dosja tashmë është dërguar në gjykatë dhe SPAK pritet të paraqesë provat për skemën e abuzimeve financiare të ish-ministrit dhe bashkëpunëtorëve të tij.
