Ditën e sotme SPAK dërgoi në Gjykatë aferën e inceneratorëve, ndërkohë që Monika Kryemadhi ka reaguar ashpër.
Sipas saj është një habi e madhe të akuzosh propozuesit e një VKM-je, për një shpronësim të paligjshëm dhe të mos akuzosh miratuesit e po kësaj VKM-je. Gjithashtu Kryemadhi shtron pyetjen se pse nuk janë në mesin e të akuzarve edhe Subashi, Agaçi apo vetë kryeministri Rama.
Gjatë shkrimit të saj, Kryemadhi ka “luajtur” me fjalën SPAK, duke i hequr “S”, pra duke nënkuptuar që është “PAK”, një institucion që nuk e ushtron detyrën në nivelet e duhura të rigozitetit.
“SPAK apo “pak”?? U njohëm sot me vendimin e S(PAK) për dërgimin e aferës së inceneratorit të Fierit në gjyq. U njohëm edhe me subjektet dhe me veprat penale konkrete që akuzohen. Habi e madhe të akuzosh propozuesit e një VKM-je për një shpronësim të paligjshëm dhe të mos akuzosh miratuesit e po kësaj VKM-je. Po Subashi, po Agaçi, po Rama, ku janë? Si i bie tashmë? SPAK apo “pak” fare?!?”, shkruan Monika Kryemadhi.
Vlen të theksojmë se Kryemadhi vazhdimisht ka paraqitur fakte të reja në lidhje me aferën e inceneratorëve. Ndërkohë është evidentuar se në akuzat e Kryemadhit nuk rezulton emri i Arben Ahmetajt, për të cilin dyshohet se ka “tradhëtuar” partinë e tij duke dorëzuar dokumentacionin e aferës korruptive.
