Byroja Kombëtare e Hetimit ka zbarkuar mbrëmjen e sotme në banesën e partneres së ministrit ish-zëvendës kryeministrit Arben Ahmetaj.
Sipas mediave bëhet me dije se vilës i është vënë shiriti ndërsa është kontrolluar edhe shtëpia e ish-bashkëshortes së Ahmetajt, Albina Macka.
Në kontrollin e kryer në shtëpinë e ish-bashkëshortes nuk është gjetur asgjë e paligjshme.
Ndërsa në shtëpinë e partneres deri tani është gjetur një shumë parash prej 30 mijë eurosh.
Këto kontrolle që po bëhen nga SPAK janë në kuadër të verifikimit të rolit që ish-ministri ka patur tek çështja e inceneratorëve.
Mësohet se policia dhe oficerët e BHK janë larguar pasi kanë kqyrur vilën për të kryer verifikimin e plotë për hetimet e filluara.
Vila në gjirin e Lalëzit është në pronësi të bashkëjetueses të Ahmetaj dhe ky i fundit nuk e ka mohuar dhe ka theksuar se është blerë me vlerë 240 mijë euro nga një biznesmen.
Kujtojmë se ish-zëvendëskryeministri Arben Ahmetaj është vënë kohët e fundit në qendër të sulmeve dhe skandaleve, për shkak se Struktura e Posaçme Kundër Krimit të Organizuar dhe Korrupsionit ka vepruar me dy standarde sa i takon hetimeve të aferës së inceneratorëve, ku lakohet se është përfshirë edhe deputeti socialist. Dy prokurorë të SPAK, të cilët tashmë janë kallëzuar për shpërdorim detyre, thuhet se kanë “amnistuar” Ahmetajn, duke mos e hetuar për inceneratorin e Elbasanit, ndërkohë që për të njëjtën dosje kanë çuar përpara drejtsisë shumë persona që kanë pasur lidhje me aferën e “djegësave”. Por ky skandal, ka bërë që vendi të zien nga debatet, teksa kryefjalë e ditës është pikërisht çështja “Ahmetaj-Inceneratorët”.
