Zgjedhjet brenda Partisë Demokratike kanë nisur prej orës 8 të mëngjesit të sotëm, ndërsa demokratët votojnë për të zgjedhur kryetarin e ri për katër vitet e ardhshme.
Pas humbjes në zgjedhjet e 25 prillit, pakënaqësitë brenda Partisë Demokratike janë rritur, me shumë figura që kanë kërkuar dorëheqjen e Lulzim Bashës. Përballë tij në garë do të jenë sot Edit Harxhi, Agron Shehaj dhe Fatbardh Kadilli.
Zgjdhjet mbahen brenda një kohe të shpejtë, ku kandidatët kanë zhvilluar fushatë gjatë tre javëve të fundit. Kadilli, Harxhi dhe Shehaj kanë deklaruar vazhdimisht se kjo ka qenë një garë e pabarabartë.
Basha, Shehaj dhe Kadilli mësohet se do të votojnë në selinë e PD, ndërsa Edit Harxhi do të votojë në njësinë nr.5. Po ashtu në seli do të votojnë edhe anëtarët e kryesisë dhe deputetët e zgjedhur. Në të gjithë vendin kanë të drejtë të votojnë 75 mijë anëtarë në 76 qendra votimi. Në zgjedhje mund të votojnë vetëm ata që kanë kartë anëtarësie, ndërsa kryetari I Komisionit Zgjedhor në PD, Jemin Gjana ka thënë se ata që kanë bërë fushatë për kundërshtarin, nuk do të lejohen të votojnë. Por ai gjithshtau ka bërë me dije se do të mund të votojnë ata që kanë kartë anëtarësie, por nuk e kanë emrin në lista.
Votimi pritet të mbyllet në orën 19:00, ndërsa të parët në selinë blu kanë shkuar Gazment Bardhi dhe Edmond Spaho.
