Mëngjesin e sotëm dy avokatët e Sali Berishës, Genc Gjokutaj dhe Sokol Mengjesi janë paraqitur në dyert e GJKKO-së, pasi do të mbahet seanca për vendosjen e masës së sigurisë për ish-kryeministrin.
Berisha ka zgjedhur që të mos paraqitet fare në Gjykatë dhe të presë vendimin nga selia blu, ndërkohë nga ana tjetër ai ka paralajmëruar në Facebook-un e tij se sot ai do të zhvillojë një takim me grupin e të rinjve demokratë.
Kujtojmë edhe një herë se SPAK ka kërkuar ‘arrest në shtëpi’ për Berishën, pasi mori autorizimin nga Kuvendi, teksa gjyqtarja Irena Gjoka pritet që sot ta pranojë këtë kërkesë, pasi më parë do të dëgjojë palët, prokurorët e SPAK dhe mbrojtjen e Berishës.
Berisha është nën hetim nga SPAK për akuzën e “Korrupsionit pasiv i funksionarëve të lartë shtetërorë ose i të zgjedhurve vendorë”, kryer në bashkëpunim. Në dosjen e klubit sportiv “Partizani” thuhet se ish-kryeministri ndikoi që dhëndri i tij Jamarbër Malltezi, që të privatizojë kompleksin dhe ndërtojë 19 kulla të cilat i sollën fitim prej 5.4 mln euro.
