Në Gjykatën e Posaçme kundër Korrupsionit dhe Krimit të Organizuar pritet të zhvillohet seanca për shqyrtimin e kërkesës së Ilir Metës për lehtësimin e masës së sigurisë, duke e zëvendësuar “arrestin me burg” me një masë më të butë.
Avokati i ish-presidentit, Kujtim Cakrani, njoftoi për News24 se Meta nuk kishte mbërritur ende në gjykatë pak minuta para nisjes së seancës.
Ai shtoi se kërkesa bazohet në mungesën e provave të mjaftueshme nga prokuroria për të justifikuar qëndrimin e Metës në masën më të rreptë të sigurisë.
Gjithashtu, Cakrani akuzoi prokurorinë për shkelje procedurale, pasi nuk ka zhvilluar të paktën katër seanca informimi mbi ecurinë e hetimeve, të cilat duhej të mbaheshin çdo dy muaj.
Në seancën e mëparshme, prokuroria paraqiti një material prej 31 faqesh, ku argumentoi disponimin e fakteve dhe provave që mbështesin vazhdimin e “arrestit me burg”. Mbrojtja kundërshtoi këtë dokument, duke e cilësuar të papërshtatshëm për të justifikuar masën e sigurisë ndaj Metës.
