Kuvendi i Kosovës do të zhvillojë sot përpjekjen e 50-të për të konstituar legjislaturën e re, të dalë nga zgjedhjet parlamentare të 9 shkurtit.
Me gjithë përpjekjet e deritanishme, ky proces vijon të mbetet i bllokuar, ndërsa afati i caktuar nga Gjykata Kushtetuese përfundon brenda një jave.
Sipas vendimit të Kushtetueses të datës 26 qershor, Kuvendi duhet të konstituohet brenda 30 ditëve. Deputetët kanë ende në dispozicion tri përpjekje të tjera për ta përmbushur këtë detyrim kushtetues.
Megjithatë, aktgjykimi nuk parashikon hapat që duhet të ndërmerren nëse as pas këtij afati nuk arrihet konstituimi i Kuvendit.
Në këtë situatë të paqartë, juristë dhe njohës të zhvillimeve politike paralajmërojnë mundësinë e hyrjes në një krizë të re institucionale. Avokati Valdet Hoxha shprehet se mungesa e një rruge të qartë ligjore për këtë rast mund të thellojë bllokadën politike në vend.
