Për të 30-ën herë me radhë, deputetët e Kuvendit të Kosovës janë thirrur në seancë për të tentuar konstituimin e legjislaturës së re, të dalë nga zgjedhjet e 9 shkurtit.
Por as seanca e fundit, më 9 qershor, nuk solli ndonjë rezultat, ajo zgjati vetëm pak minuta, pa asnjë vendim konkret.
Pengesa kryesore mbetet refuzimi i deputetëve për të miratuar krijimin e një komisioni që do të mbikëqyrte votimin e fshehtë për zgjedhjen e kryetarit të Kuvendit.
Lëvizja Vetëvendosje, si forca fituese e zgjedhjeve, këmbëngul në kandidaturën e Albulena Haxhiut për këtë post, por kjo propozim has në kundërshtim të fortë nga partitë e tjera, të cilat e konsiderojnë Haxhiun si një figurë polarizuese.
Debati është përqendruar gjithashtu në formën e votimit, i hapur apo i fshehtë një çështje që është dërguar për interpretim në Gjykatën Kushtetuese nga partitë që më parë ishin në opozitë.
Këto parti pretendojnë se propozimet e LVV-së bien ndesh me Kushtetutën dhe kanë kërkuar pezullimin e seancave derisa Gjykata të japë një vendim përfundimtar.
Procesi i bllokuar ka ndalur edhe hapat e tjerë institucionalë. Pa zgjedhjen e kryetarit dhe pesë nënkryetarëve, Kuvendi nuk mund të quhet i konstituar dhe rrjedhimisht, as qeveria e re nuk mund të formohet.
