Kanë kaluar pesë vjet që kur Organizata Botërore e Shëndetësisë shpalli COVID-19 si pandemi globale, duke sjellë ndryshime të mëdha në jetën e njerëzve dhe në ekonominë botërore.
Në fillim, bllokimet masive dhe zhvillimi i shpejtë i vaksinave ishin prioriteti kryesor, por sot sfidat kryesore lidhen me pasojat afatgjata të pandemisë, përfshirë ndikimin në shëndet, ekonomi dhe shoqëri.
Një nga efektet më të mëdha të COVID-19 është fenomeni i njohur si “COVID i gjatë”, ku shumë prej atyre që e kanë kaluar virusin vazhdojnë të vuajnë nga probleme shëndetësore kronike. Simptomat më të zakonshme përfshijnë lodhje të vazhdueshme, vështirësi në frymëmarrje dhe probleme neurologjike.
Gjithashtu, pandemia ndikoi ndjeshëm në shëndetin mendor, duke rritur rastet e depresionit dhe çrregullimeve të sistemit nervor, një fenomen i vërejtur edhe në Shqipëri.
Sëmundjet kardiovaskulare dhe ato të trurit vijuan të jenë ndër shkaqet kryesore të vdekjeve gjatë pandemisë.
Viktima e parë dhe situata në Shqipëri
Pandemia e koronavirusit të ri mbërriti në Shqipëri në mars 2020 dhe zyrtarisht preku rreth 10% të popullsisë.
Të infektuarit e parë të konfirmuar me COVID-19 në Shqipëri ishin babë e bir, të cilët kishin hyrë në vend më 26 shkurt 2020 nga pika kufitare e Hanit të Hotit. Fillimisht, virusi u zbulua te djali, i cili më pas e transmetoi te i ati.
Viktima e parë e COVID-19 në Shqipëri ishte një grua 73-vjeçare nga Durrësi, e cila ndërroi jetë më 11 mars 2020.
Sipas vlerësimeve, afërsisht 12,689 persona kanë humbur jetën në Shqipëri gjatë viteve 2020-2021 si pasojë e drejtpërdrejtë ose e tërthortë e COVID-19. Kjo shifër është 3.9 herë më e lartë se statistikat zyrtare të vdekjeve të raportuara nga COVID-19.
Kulmi i krizës në Shqipëri u shënua gjatë muajve nëntor 2020 dhe shkurt-mars 2021. Në pranverën e vitit 2021, qeveria shqiptare nuk mori masa kufizuese shtesë, ndërsa vendi po përgatitej për zgjedhjet e 25 prillit.
