Sot, deputetët e Kuvendit të Kosovës do të zhvillojnë përpjekjen e 51-të për konstituimin e legjislaturës së re, ndërsa afati kushtetues për përfundimin e këtij procesi po afrohet me hapa të shpejtë.
Më 26 qershor, Gjykata Kushtetuese i dha Kuvendit një ultimatum prej 30 ditësh për të përfunduar seancën konstituive, duke zgjedhur Kryetarin dhe nënkryetarët e tij.
Megjithatë, Lëvizja Vetëvendosje vazhdon të mbetet e palëkundur në kandidaturën e Albulena Haxhiut për kryetare të Kuvendit, ndërsa partitë e tjera nuk e përkrahin këtë emër si zgjidhje kompromisi.
Në këtë situatë, kryesuesi aktual i Kuvendit, Avni Dehari, ka propozuar formimin e një Komisioni zgjedhor që do të lehtësonte votimin e fshehtë për kryetarin e Kuvendit, por kjo nismë nuk ka gjetur mbështetje nga partitë e tjera.
Ngërçi politik që ka zgjatur muaj të tërë vazhdon të ndikojë negativisht, ndërkohë që zgjedhjet parlamentare u mbajtën më 9 shkurt 2025, por institucionet e reja ende nuk janë krijuar.
Gjykata Kushtetuese në aktgjykimin e datës 26 qershor (rasti KO124/25), i është përgjigjur kërkesës së deputetëve që kundërshtonin refuzimin për formimin e Komisionit për votim të fshehtë dhe vendime të tjera të ngjashme nga seancat e mëparshme konstituive.
Gjykata ka vënë në dukje se seanca konstituive, e nisur më 15 prill 2025, nuk është përfunduar për shkak të moszgjedhjes së Kryetarit dhe nënkryetarëve, duke shkelur kërkesat kushtetuese të nenit 66 të Kushtetutës.
Në këtë kontekst, deputetët janë të detyruar brenda 30 ditëve nga hyrja në fuqi e këtij vendimi të përfundojnë seancën konstituive, duke zgjedhur Kryetarin dhe nënkryetarët e Kuvendit.
Kjo do të thotë se palët politike kanë tani një afat të qartë deri më 26 korrik 2025 për të tejkaluar bllokadën dhe për të formuar drejtuesit e Kuvendit në përputhje me Kushtetutën.
