Konklavi për zgjedhjen e Papës së 267-të në historinë e Kishës Katolike Romake nis sot në Vatikan, me pjesëmarrjen e 133 kardinalëve.
Para nisjes së procesit zgjedhor, në Bazilikën e Shën Pjetrit do të mbahet një Meshë solemne “Pro Eligendo Romano Pontifice”, e drejtuar nga dekani i Kolegjit të Kardinalëve, Giovanni Battista Re.
Më pas, kardinalët do të drekohen dhe do të nisen drejt Kapelës Sistine.
Në këtë vend të shenjtë, ku zhvillohet konklavi, kardinalët do të betohen për ruajtjen e fshehtësisë absolute mbi të gjitha zhvillimet që lidhen me zgjedhjen e papës.
Rreth orës 16:30, me shqiptimin e formulës latine “extra omnes” që kërkon largimin e të gjithë personave të tjerë, konklavi nis zyrtarisht.
Procesi parashikon disa raunde votimesh në ditë derisa një kandidat të sigurojë shumicën e cilësuar dy të tretat e votave plus një.
Pas çdo raundi të dytë pa rezultat, fletët e votimit digjen në një mënyrë të tillë që nga oxhaku i Kapelës Sistine të dalë tym i zi, sinjal për mungesë zgjedhjeje.
Tym i bardhë do të sinjalizojë zgjedhjen e papës së ri, që ndodh kur një kandidat pranon postin dhe zgjedh emrin që do ta përfaqësojë në këtë rol.
Ndër emrat më të përfolur për fronin papnor janë Sekretari i Shtetit të Vatikanit Pietro Parolin, kreu i Konferencës së Ipeshkvijve Italianë Matteo Cuppi, Peter Turkson nga Gana dhe filipinasi Luis Antonio Tagle.
Pas zgjedhjes, protodiakoni kardinal do të dalë në ballkonin e Bazilikës së Shën Pjetrit për të shpallur “Habemus Papam” (Kemi një Papë), ndërsa Papa i ri do të japë bekimin e parë “Urbi et Orbi” (Romës dhe botës), i veshur me petkat papnore të bardha dhe mantelin liturgjik të kuq.
Menjëherë pas këtij momenti, në Vatikan do të mbahet mesha e parë e papës së ri, në prani të klerikëve dhe besimtarëve nga e gjithë bota. Dy konklavat e fundit, në vitet 2005 dhe 2013, përfunduan brenda dy ditësh.
Për mbarëvajtjen dhe sigurinë e këtij procesi historik, mbi 4,000 forca policore janë angazhuar në Romë, ndërsa autoritetet presin qindra mijëra pelegrinë dhe turistë.
Papa Françesku, i cili u zgjodh në vitin 2013 dhe vdiq më 21 prill në moshën 88-vjeçare, u varros në Bazilikën e Santa Maria Maggiore.
