Ditën e sotme Fetah Marra nuk doli dot para togave të zeza, pasi gjyqi për të u shty nga gjykata. Marra është autori i vrasjes së fqinjës së tij, Fatime Suli, 63 vjeç mbrëmjen e 20 janarit 2022 në lagjen “Havaleas” në Kozare të Kuçovës.
Vrasësi i 63-vjeçares Fatime Suli në fshatin Kozare nuk është paraqitur sot në Gjykatën e Beratit, kur edhe ishte caktuar se do të zhvillohej seanca paraprake ndaj tij.
Mësohet se Fetah Marra nuk u paraqit në seancën paraprake, në momentet e fundit, ai dha justifikimin si i sëmurë, por nuk ka një konfirmim mjekësor në lidhje me këtë. Familjarët e viktimës 63-vjeçe janë irrituar mjaft pasi ata do të kërkonin sot në këtë seancë paraprake rikthimin e dosjes në Prokurorinë e Beratit për hetime të mëtejshme. Avokati i familjes Suli Ramiz Oboni ka deklaruar më herët se familjarët e të ndjerës janë të pakënaqur me hetimet pasi pretendojnë se bashkëpunëtor në vrasje me Fetah Marrën ka qene edhe komshiu i tyre Izet Marra, për të cilin viktima u kishte thënë se e ngacmonte seksualisht prej muajsh. I pranishëm në seancën paraprake ishte edhe i dyshuari i familjes Suli Izet Marra, i cili ka kërkuar shtyrjen e seancës paraprake për mungesë të një avokati që ta përfaqësonte atë. Në këto kushte, seanca paraprake u shty për në datën 8 Shtator. Sipas familjarëve, shtirja e Fetah Marrës si i sëmurë dhe mosparaqitja e tij në këtë seancë është bërë pikërisht për të siguruar e dhënë kohë Izet Marrës, të dyshuarit të familjes Suli si bashkëpunëtor në vrasje. Mësohet se nga ana e familjarëve do të kërkohej sot që kjo çështje të mos kalonte për gjykim por të rihetohej me pretendimin se hetimet janë të cekëta dhe për rrjedhojë organi i akuzës ka arritur në përfundimin e gabuar në lidhje me shtetasin Izet Marra.
