Këngëtari Ergi Dini do të festonte ditën e sotme 26-vjetorin e lindjes nëse do të ishte ende në këtë botë. Artistit u nda nga jeta në vitin 2016-të pas një aksidenti tragjik me motor.
Por edhe pse kanë kaluar katër vite nga vdekja e tij askush nuk e ka harruar këngëtarin, pasi herë pas here miqtë, fansat dhe familjarët e kujtojnë në forma të ndryshme dhe ditën e sotme ishte motra e tij Barbana Dini që na emocionoi të gjithëve.
Ajo nuk mund ta kalonte këtë ditë kaq të veçantë për të pa një dedikim shumë prekës me të cilin na theu zemrat të gjithëve. Këngëtarja ka publikuar në Instagram një fotografi të Ergit dhe fjalët që i ka kushtuar janë shumë prekëse.
“Sot është dita jote e lindjes! Sa dhimbje e madhe është të kesh shumë gjëra për të thënë dhe të mos kesh mundësinë t’i thuash, sepse asnjë fjalë nuk ka më vlerë dhe nuk ndryshon asgjë… Sa dhimbje të jetosh pa ty, sa dhimbje të mos kesh prezencën tënde për t’i dhënë kuptimin që kishte jeta me ty… Sa gjëra do të doja të t’i thosha”, ka shkruar Barbana.
Ndërkohë një vit më parë këngëtarja përmbushi amanetin e vëllait të saj, duke bërë publike një këngë që ai e kishte lënë përgjysmë. Kënga me titull “Ku je” erdhi si një homazh për artistin, i cili e kishte punuar vetë një pjesë të tekstit para se të ndërronte jetë.
