Ekipi i futbollit të grave të Afganistanit është evakuuar nga vendi ditën e sotme së bashku me familjarët e tyre. Lajmin e ka dhënë sindikara globale e futbollistëve FIFPRO, e cila falenderon qeverinë australiane për evakuimin e një numri të madh të grave futbolliste dhe atlete nga Afganistani.
“Këto gra të reja, si sportiste dhe aktiviste, kanë qenë në një pozitë rreziku dhe në emër të bashkëmoshatarëve të tyre në të gjithë botën falënderojmë bashkësinë ndërkombëtare për ndihmën e tyre.
Ne do të donim t’i kushtonim haraç punës së palodhshme dhe të vazhdueshme të shumë njerëzve, duke përfshirë Khalida Popal, Kelly Lindsey, Nikki Dryden, Alison Battisson, Haley Carter dhe Craig Foster për t’i ndihmuar ata të sigurojnë kalim të sigurt nga Afganistani”, shkruhet në një deklaratë të FIFPRO.
Khalida Popal, ish -kapitene e ekipit kombëtar të Afganistanit, e cila vazhdimisht kishte bërë thirrje për ndihmë, tha se sot është arritur një fitore e rëndësishme
“Ditët e fundit kanë qenë jashtëzakonisht stresuese, por sot kemi arritur një fitore të rëndësishme. Gratë futbolliste kanë qenë të guximshme dhe të forta në një moment krize dhe shpresojmë se do të kenë një jetë më të mirë jashtë Afganistanit. Por ka akoma shumë punë për të bërë. Futbolli i grave është një familje dhe ne duhet të sigurohemi që të gjithë të jenë të sigurt “, tha Popal.
Jonas Baer-Hoffmann, Sekretari i Përgjithshëm i FIFPRO tregoi se procesi ka qenë shumë kompleks për të gjithë, ndërsa shtoi se mendimet shkojnë me ata që janë të bllokuar në vend kundër vullnetit të tyre.
