Gazetari dhe Drejtori i Përgjithshëm i televizionit “ABC NEWS”, Sokol Balla, është paraqitur sot në ambientet e Prokurorisë së Posaçme kundër Korrupsionit dhe Krimit të Organizuar.
Ai është thirrur për t’u marrë në pyetje në kuadër të hetimeve që po zhvillohen ndaj ish bashkëshortes së tij, Belinda Balluku. Sipas informacionit, Balla është ftuar nga prokurori Dritan Prençi dhe është marrë në pyetje në cilësinë e personit që ka dijeni për rrethanat e çështjes.
Pas më shumë se një ore në ambientet e SPAK, gazetari është larguar pa dhënë asnjë deklaratë për mediat.
Sokol Balla ka qenë më parë bashkëshorti i Belinda Ballukut. Edhe pse ata janë të divorcuar, raporti mes tyre ka vijuar edhe pas ndarjes.
Në kuadër të hetimeve, ka dyshime se nga kjo marrëdhënie Balla mund të ketë përfituar pasuri të konsideruara të dyshimta, nga biznesmenë të ndryshëm në Tiranë, të cilët sipas pretendimeve kanë përfituar tendera nga Belinda Balluku. Hetimet për këtë çështje vijojnë.
