SPAK ka zbarkuar këtë të premte te drejtoresha e sapoemëruar e KESH-it, duke konfirmuar se jo të gjithë të afërmit politikë mund të mbrohen me të njëjtën skemë. Hetimet që lidhen me rrethin e Belinda Ballukut po avancojnë, ndërsa mburoja politike funksionon vetëm për disa dhe vetëm përkohësisht.
Detaje të reja kanë dalë në dritë nga kontrollet e ushtruara me urdhër të SPAK, në kuadër të hetimeve që lidhen me tenderat në sektorin e infrastrukturës dhe energjisë. Byroja Kombëtare e Hetimit ka zhvilluar 19 kontrolle në banesa dhe ambiente pune të zyrtarëve shtetërorë dhe biznesmenëve të përfshirë në dosjen hetimore.
Mes personave të kontrolluar është edhe Viola Haxhiademi, ish-sekretare e Përgjithshme e Ministrisë së Infrastrukturës dhe Energjisë, e konsideruar për vite me radhë krahu i djathtë i Ballukut. Haxhiademi është emëruar vetëm pak ditë më parë drejtoreshë e KESH, ndërkohë që prej disa vitesh telefoni i saj është marrë shpesh herë nga SPAK për kontroll, si pjesë e hetimeve në zhvillim.
Ndryshe nga Ceno Klosi, i cili u çua nga pozicioni i zëvendësministrit në atë të deputetit duke përfituar imunitet politik dhe duke u mbrojtur përkohësisht nga veprimet e SPAK, jo të gjithë bashkëpunëtorët kanë të njëjtin fat. Skema e përkohshme e dërgimit në Parlament nuk mund të aplikohet për të gjithë.
Hetimi ndaj Haxhiademit tregon se mbrojtja politike ka kufij dhe se radha në SPAK nuk mund të shmanget pafundësisht. Ceno Klosi u shpëtua për momentin përmes mandatit të deputetit, ndërsa Viola Haxhiademi dhe emra të tjerë të rrethit të ngushtë po përballen një e nga një me drejtësinë. Mesazhi është i qartë: jo të gjithë mund të bëhen deputetë për t’u mbrojtur dhe askush nuk mund t’i shpëtojë SPAK-ut.
