Dy ditë më parë presidenti i vendit Ilir Meta dha një intervistë për ‘Opinion’, ku ka bërë deklarata të forta që kanë bërë jehonë në media.
Ndër të tjera, kreu i vendit publikoi mesazhin e një diplomati të huaj, që sipas tij, e ka nisur në emër të BE dhe SHBA, ku tregohen diskutimet që janë bërë jashtë syrit të medias në periudhën kur zgjidheshin anëtarët e rinj të Gjykatës Kushtetuese.
“Mirmëngjes Beni. I takova kolegët e mi amerikane dhe të BE dhe folëm mE Ramën në telefon. Ata nuk e mbështesin pozicionin e Presidentit për pezullimin dhe këtë nuk ma thanë në darkë. Ata besojnë që Arta Vorpsi tani është caktuar si rezultat i mekanizmit zhbllokues dhe ata do të dalin sot publikisht dhe kemi rënë dakord. Rama ra dakord që Marsida Xhaferllari të jetë në listën e Presidentit për nominim për tjetrën. Dhe Rama nuk do përpiqet të bllokojë këtë. M’u kërkua t’jua kaloja këtë SMS.”
Në mesazhin diplomatit thuhet se Rama nuk do ta bllokojë kandidaturën e Marsida Xhaferllarit në listën tjetër për anëtare të Gjykatës Kushtetuese, çka për presidentin Meta tregon qartë ndikimin e kryeministrit në Reformën në Drejtësi.
Ditën e sotme, Meta ka reaguar në një intervistë për ‘Albanian Daily News’ pas publikimit të mesazhit të diplomatit të huaj, duke thënë se shërben si një kambanë alarmi për të gjithë.
Sipas tij mesazhi synon të tregojë paaftësinë e ekspertëve ndërkombëtarë të cilët në rastin në fjalë nuk mbështesnin qëndrimin e presidentit, por qëndrimin e Dvorani, pra të kryeministrit Rama, në shkelje të qartë të Kushtetutës për t’i rrëmbyer presidentit një kompetencë kushtetuese që i takonte vetëm atij.
“Ky mesazh po publikohet mbas 7 muajsh, pikërisht sepse është më aktual se kurrë dhe shërben si një kambanë alarmi për të gjithë. Ai tregon se ishte i domosdoshëm si një akt sovraniteti, transparence, por edhe paralajmërimi, për cdo aktor që mban përgjegjësi për dështimet e rënda të Reformës në Drejtësi dhe që tenton ta ndajë këtë dështim me të vetmin aktor të përgjegjshëm, me integritet, super-bashkëpunues, dhe paralajmërues për këto pasoja të zbatimit të njëanshëm dhe në errësirë të Reformës në Drejtësi që është Presidenti i Republikës”, u shpreh Meta.
Lidhur me platformën që u ka propozuar palëve për vijimin e Reformës në Drejtësi.Meta u shpreh se qëllimi i vetëm është zbatimi i Kushtetutës dhe 15 kushteve të BE.
