Me rastin e 2 Qershorit, Festës së Republikës italiane u inaugurua “Sheshi Italia”, ku u vendos gjithashtu edhe skulptura e artistit Helidon Xhixha e quajtur “Big Bang”. I pranishëm në inaugurim ishte edhe kryetari i Bashkisë së Tiranës, Erion Veliaj i cili tha: “Nga një rotondo dhe nga një vend ku parkoheshin makina, një shesh i lënë pas dore prej vitesh të tëra, e transformuam, por harruam që ta inauguronim.
Nëse më përpara ishte vetëm një vend për parkimin e makinave, sot është një vend për të gjithë njerëzit. Ky shesh animohet me disa kafene “alla italiana”, ku “Dolce vita” i afrohet shumë stilit italian. Gjatë pasdites fëmijët janë këtu me patina, ose duke mësuar biçikletën. Ia kemi kthyer njerëzve.
Është një shesh që jo vetëm ka emrin e Italisë, por është rrethuar nga Italia, duke filluar nga vepra që kam përballë e Marko Kazamontit, deri tek fiorentinët e tjerë të veprave”, u shpreh fillimisht Veliaj.
Më pas, bëri një krahasim të skulpturës së artistit Helidon Xhixha me marrëdhënien e Shqipërisë me Italinë. “Marrëdhënia e Shqipërisë me Italinë, është e fortë si çeliku, me të cilin ti punon, edhe shkëlqen si dielli, të cilin e reflekton vepra jote”, përfundoi kryebashkiaku i Tiranës.
