Pamje dhe detaje të reja kanë dalë në dritë nga atentati mafioz që ndodhi mbrëmjen e djeshme në Greqi, ku mbeti i vrarë shqiptari Roan Brahimi, armiku i Ervis Martinaj.
Në fotot e publikuara nga mediat greke, 32-vjeçari shqiptar, baba i një fëmije shihet i pajetë brenda makinës së tij Mercedez Benz. Roan Brahimi u vra në sediljen e shoferit, i zënë në pritë nga autorët, ndërsa një grua që dyshohet se është bashkëshortja e tij, është në gjendje të rëndë psikologjike, teksa mban duart në kokë.
Dëshmitar i skenës së krimit ka qenë dhe fëmija i Roan Brahimit, i cili ka qenë duke luajtur me disa bashkëmoshatarë në momentin e atentatit. Disa dëshmitarë, banorë të zonës, kanë treguar momentet e tmerrit, ndërsa autorët dyshohet se kanë qenë duke lëvizur me motor.
“Vajza ime e vogël po luante me femijen e tij. Dëgjuam të shtënat dhe vrapova për të parë nëse ishte diçka apo ishte thjesht një lojë. Vogëlushja qante dhe thoshte “babai im, babi im”, thotë një grua dëshmitare.
“Dëgjuam të shtënat. E kuptuam që diçka ndodhi, vrapuam, pamë makinën të parkuar në cep dhe gruaja e tij bërtiste “ndihmë, ndihmë”, përshkruan një dëshmitar okular, duke përmendur se çifti ishte vetëm në makinë.
Pista kryesore në të cilën dyshon policia, është se atentati ka ndodhur për shkak të hakmarrjes mes grupeve kriminale. Roan Brahimi ka qenë në kërkim nga policia shqiptare për disa ngjarje të rënda kriminale, ndërsa ka pasur dyshime se ai ka qenë i përfshirë dhe në atentatin e përgjakshëm që ndodhi pranë urës së Tapizës, ku u hodh në erë makina ku udhëtonte Brilant Martinaj dhe miq të tij.
