Studentët nuk e kanë pasur të lehtë të vazhdojnë protestën mes kërcënimeve nga personat me poste të rëndësishëm. Dhe një e tillë është bërë publike nga mediat dje, me publikimin e videos së drejtoreshës së shkollës së mesme “Sami Frashëri”, Teuta Dobi, e cila kërcënoi nxënësit të mos merrnin pjesë në protestën e studentëve.
Në videon e publikuar nga “BalkanWeb” tregohej momenti kur, drejtoresha mblodhi Senatin e nxënësve duke iu drejtuar se, do të garantonte me jetën e saj që askush të mos merrte pjesë në protestë, për sa kohë është në mësim.
Videoja e regjistruar nga nxënësit u bë publike në media dhe ditën e sotme drejtoresha e kësaj shkolle mori një tjetër vendim.
Drejtoresha Dobi mblodhi sot sërish nxënësit e Senatit të shkollës, për t’ju marrë me dhunë telefonat e për të gjetur fajtorin. Sipas burimeve të mediave, drejtoresha e shkollës ka kërkuar edhe praninë e forcave të policisë, ndërsa u ka sekuestruar nxënësve të Senatit të shkollës telefonat, në përpjekje për të zbuluar se cili prej tyre ka regjistruar videon.
Burimi: Balkanweb
