Një skemë mashtruese investimesh, e fshehur pas emrit “TXEX”, po godet mijëra qytetarë shqiptarë duke u marrë kursimet e jetës përmes një platforme të rreme kriptovalutash që operon pa asnjë licencë dhe jashtë çdo kontrolli ligjor.
Sipas denoncimeve të shumta, më shumë se 6000 shqiptarë kanë rënë pre e kësaj skeme, me humbje që kapin shifrën mbi 5 milionë dollarë. TXEX paraqitet si aplikacion investimi në kriptovaluta, por në realitet është një mashtrim i sofistikuar që shfrytëzon rrjetet sociale, duke përhapur reklama joshëse në TikTok, Instagram, Telegram dhe WhatsApp.
Individë anonimë prezantohen si “ekspertë tregu” apo “mentorë financiarë” dhe ftojnë përdoruesit në grupe të simuluara ku paraqiten fitime false dhe komente të fabrikuara. Viktimat nisen duke investuar shuma të vogla përmes platformave reale si Binance, por më pas fondet u transferohen tek TXEX, ku fillon mashtrimi.
Në aplikacion, përdoruesit shohin fitime të përditshme të rreme. Por sapo kërkojnë tërheqjen e tyre, iu kërkohet një tarifë shtesë prej 400 dollarësh për “verifikim” ose “shpenzime”. Pasi paguajnë, llogaritë bllokohen dhe komunikimi me administratorët ndërpritet. Përveç humbjes së parave, shumë qytetarë raportojnë se iu janë kërkuar edhe dokumente personale si ID dhe foto, duke ngritur alarmin për keqpërdorim të të dhënave.
Disa viktima kanë humbur deri në 5000 euro, ndërsa të tjera kanë marrë borxhe për të investuar, të bindur nga tërheqjet fillestare të vogla që i jepnin besueshmëri platformës.
Më 17 prill 2025, Autoriteti i Mbikëqyrjes Financiare të Zelandës së Re (FMA) e shpalli TXEX si mashtrim financiar, duke e lidhur me një rrjet ndërkombëtar të njohur si “2139 Exchange”, i cili ka operuar në Azi dhe Afrikë. Platforma përdor të njëjtat taktika, ndërsa disa denoncues thonë se administratorët lokalë janë nga Lezha.
Në Shqipëri, TXEX nuk figuron në QKB, nuk ka licencë nga Banka e Shqipërisë apo Autoriteti i Mbikëqyrjes Financiare dhe nuk ka asnjë adresë zyrtare. Megjithatë, skema vazhdon të funksionojë përmes komunikimit në shqip dhe grupeve të dedikuara për tregun vendas.
Denoncimet e qytetarëve janë të shumta dhe të ngjashme: fillimisht fitimet dukeshin reale, më pas u kërkua tarifa prej 400 dollarësh dhe më pas llogaritë u mbyllën. Disa raportohet se kanë dorëzuar të dhënat e kartës së identitetit, duke e rritur rrezikun për mashtrime të tjera.
Edhe deputeti Erion Braçe ka ngritur publikisht alarmin, duke thënë se vetëm në Divjakë janë mbi 1000 persona të prekur dhe se skema po shtrihet edhe në Lushnje. Ai bën apel që qytetarët të dalin menjëherë nga platforma dhe të denoncojnë në polici: “Dilni sa më shpejt nga kjo piramidë dhe dorëzoni telefonin tuaj që hetuesit të kenë mundësi të ndjekin përgjegjësit përmes rrjedhjes së parave.”
Përmasat e kësaj skeme mashtruese janë alarmante: mijëra qytetarë kanë humbur kursimet, disa paratë e marra borxh, duke rënë pre e manipulimit psikologjik, profileve false dhe teknologjisë deepfake.
Ndërkohë, institucionet shqiptare mbeten në heshtje, duke mos marrë ende masa konkrete ndaj një mashtrimi që ka përfshirë mbi 6 mijë qytetarë dhe miliona dollarë të humbur.
Ky është një rast që kërkon reagim urgjent dhe ndërhyrje të menjëhershme të autoriteteve, për të mbrojtur qytetarët nga humbje të tjera dhe për të ndëshkuar organizatorët e kësaj skeme piramidale.
