Një raport i Kontrollit të Lartë të Shtetit nxjerr në pah një realitet shqetësues: gjatë vitit 2024, Shqipëria u mbush me ilaçe të skaduara, të cilat përfunduan në duart e pacientëve përmes skemës së rimbursimit.
Sipas auditit, barna që duhet të përdoreshin vetëm në spitale u shpërndanë në farmaci dhe iu dhanë qytetarëve, në shumë raste në ditën e fundit të skadencës ose vetëm pak ditë para saj. Pra, pacientët që shkonin për të marrë ilaçin e rimbursuar, në fakt merrnin produkte që po dilnin nga përdorimi.
Nga mbi 3.6 milionë njësi barnash me vlerë rreth 3.2 miliardë lekë, mijëra prej tyre rezultojnë të jenë shitur në kufijtë e skadencës. Në dhjetëra raste, ilaçet kanë pasur afat vetëm 1 deri në 5 ditë, një praktikë që rrezikon drejtpërdrejt efektivitetin e trajtimit dhe sigurinë e pacientëve.
Por skandali nuk ndalet këtu. Auditimi zbulon se disa farmaci kanë marrë ilaçe me vlerë zero dhe i kanë shitur si të rimbursueshme, duke marrë pagesë të plotë nga shteti. Pra, qytetarët dhe buxheti publik kanë paguar për barna që nuk kanë pasur asnjë kosto reale për farmacitë.
Eksperti Ilir Ciko shprehet se dëmet financiare arrijnë të paktën 380 deri në 430 milionë lekë dhe thekson se problemi kryesor është mungesa e kontrollit, jo mungesa e parave.
Ndërkohë, në spitalet publike situata është po aq shqetësuese. Në QSUT mungojnë rreth 40% e barnave, madje edhe medikamente jetike që në letra rezultojnë si të disponueshme, por në realitet nuk gjenden.
E gjitha kjo ndodh ndërsa Shqipëria shpenzon vetëm rreth 7% të PBB-së për shëndetësinë, duke lënë një barrë të madhe mbi qytetarët. Në praktikë, kjo do të thotë se pacientët jo vetëm paguajnë më shumë nga xhepi, por rrezikojnë edhe të marrin ilaçe që nuk duhet të ishin më në përdorim.
