Skandali i zbuluar në spitalin Onkologjik në QSUNT, ku mjekë dhe infermierë dyshohet se detyronin pacientët të shkonin në klinika private ose të blinin medikamentet në farmaci private, është komentuar ashpër nga ministrja e Shëndetësisë, Albana Koçiu. “Ngjarje e paprecedentë, jam e neveritur nga kjo histori. Këta persona nuk përfaqësojnë bluzat e bardha, që punojnë me profesionalizëm dhe përgjegjësit e kësaj historie nuk kanë vend në sistemin shëndetësor publik,” deklaroi Koçiu.
Në deklaratën e saj, ministrja theksoi rëndësinë e misionit human të mjekëve, që është të ndihmojnë shëndetin dhe të shpëtojnë jetë. Ajo shtoi se ata që janë përfshirë në këtë skandal nuk mund të ndotin reputacionin e bluzave të bardha. “Ngjarja e sotme patjetër që të krijon një neveri të madhe. Mbi të gjitha kur bëhet fjalë për jetë njerëzish. Mbi të gjitha kur flasim për punonjësit e sistemit të shëndetësisë të cilët misionin e tyre primar kanë humanizmin, shpëtimin e jetëve të njerëzve,” tha Koçiu.
Ministrja premtoi ndëshkimin e të gjithë personave përgjegjës sipas ligjit dhe procedurave administrative. “Të gjithë personat përgjegjës do të ndëshkohen sipas ligjit, sipas procedurave administrative dhe të jetë e qartë njëherë e përgjithmonë që këta lloj personash nuk mund të ndotin bluzat e bardha,” përfundoi ajo, duke theksuar se individët e përfshirë në këtë skandal nuk kanë vend në sistemin shëndetësor.
