Pas skandalit ku në WhatsApp, nisën të qarkullojnë të dhënat e shqiptarëve, përfshirë numri personal i kartës së identitetit, puna dhe rrogat, ka ardhur reagimi i Ministrisë Financave dhe Ekonomisë.
Në deklaratën e saj, kjo ministri shprehet se të dhënat nuk kanë dalë nga ky institucion, teksa shton se është bërë gati të denoncojë këtë rast tejet abuziv me të dhënat personal të qytetarëve të Shqipërisë.
Deklarata e Ministrisë së Financave dhe Ekonomisë
Ministria e Financave dhe Ekonomisë ka ndjekur me shqetësim daljen e të dhënave mbi pagat e shtetasve shqiptarë. Analizat paraprake tregojnë qartësisht se nuk ka ndodhur asnjë eksport digjital i databazës së pagave për periudhën janar – prill 2021 në fushat e dokumentit të hedhur në qarkullim.
Dokumenti ka një numër të ndryshëm nga personat e deklaruar dhe është bashkim i disa copave të ndryshme. Po ashtu databaza digjitale zyrtare e të dhënave të disponueshme nuk e përmban fushën “Emri i Plotë” siç lexohet në këtë dokument ilegal.
Agjencia Kombëtare e Shoqërisë së Informacionit ka mbyllur prej rreth një muaji termat e referencës për procedurën e hapur ndërkombëtare të auditimit për efekt të certifikimit me standardet ISO të sistemit informatik të tatimeve, e cila shpallet zyrtarisht javët e ardhshme. Ndërkohë ministria e Financave dhe Ekonomisë po përgatit denoncimin zyrtar për prokurorinë, në kërkim të zbardhjes së kësaj ndërhyrjeje kriminale në databazën e pagave të qytetarëve të Republikës së Shqipërisë
