Mediat e huaja kanë raportuar se qeveria shqiptare ka thyer embargo ndërkombëtare të gazit dhe naftës ndaj qeverisë siriane, duke furnizuar me gaz të lëngshëm regjimin në Damask të Sirisë.
Sipas medias “The Fuse”, anijet-cisternë të nisura nga Porto Romano në Shqipëri, kanë fikur transmetuesit e vendndodhjes në momentin që lundronin në detin Mesdhe për të shmangur gjurmimin në radarë.
Për disa muaj radhazi, gazetari libanez Noam Raydan, ka gjurmuar itenerarin e anijeve të nisura nga Shqipëria, duke zbuluar kështu skandalin e radhës.
Kujtojmë se gjatë gjithë vitit 2020, anijet janë parë në Porto Romano dhe më pas në portin e Baniyasit në Siri. Dy prej anijeve janë monitoruar për muaj të tërë, kur edhe është zbuluar thyerja e embargos.
Një prej rasteve të gjurmuara është edhe anija-cisternë “LPG Melody”, e larguar nga Porto Romano e Durrësit në 16 nëntor, ndërsa në 22 nëntor po priste në brigjet e Qipros, ku edhe çaktivizoi transponderin e saj, duke bërë që të mos kapet nga radarët.
Anija vazhdoi rrugën drejt Sirisë dhe u pa në brigjet e Baniyas përmes pamjeve satelitore.
2 ditë më pas, anija u shfaq sërish në Qipro, ku edhe ndezi transmetuesin e vendndodhjes.
“Kur transponderi fiket, ka diçka të dyshimtë, punonjësit, kapiteni, pronarët nuk duhet t’i çaktivizojnë për asnjë moment”, deklaroi kreu i Zhvillimit të Biznesit në Agjencinë Ndërkombëtare të Vlerësimit të Rrezikut Detar (IMRRA), Ëayne Hurley.
Duke u bazuar në të dhënat e servirura në internet, anija-cisternë “LPG Melody”, ka ndryshuar flamurin e saj 3 herë nga 2015 në 2018, duke kaluar midis Mongolisë, Tanzanisë dhe Komoreve.
Ekspertët kanë deklaruar se këto shtete kanë “një rekord tepër të dobët të zbatimit të ligjit ndërkombëtar”.
Mirëpo ndër të tjera, anija-cisternë “Melody” e nisur nga Porto Romano i Durrësit dhe që theu embargon ndërkombëtare, ka një histori të veçantë.
Në vitin 2015 ajo quhej “Blue Way” dhe ishte në pronësi të kompanisë Turke Milenyum Energy SA, që ishte në listën e zezë dhe e sanksionuar nga Departamenti amerikan i Thesarit, për të njëjtën shkelje, furnizimin me gaz të Sirisë.
Sipas Departamentit të Thesarit “Milenyum i është përgjigjur nevojave të energjisë së regjimit Sirian duke mundësuar rregullisht dërgimin e produkteve të tilla si gazi i lëngshëm i naftës dhe Gasoil në portin e Baniyas të kontrolluar nga Qeveria Siriane, me gjasë për SYTROL ose subjekte të tjera të qeverisë Siriane”, thuhet ndër të tjera në raportin e Departamentit të Thesarit.
Po ashtu një tjetër anije e nisur po nga Porto Romano drejt Sirisë duke thyer embargon e SHBA dhe BE-së është “Jaguar S”./Gazetareforma.com/
