Para pak ditësh ndodhi një skandal me të dhënat private të shqiptarëve ku u publikuan pagat e mbi 637 mijë punonjësve publik e privat, krahas së cilës tregohet edhe numri i kartës së identiteti dhe vendi ku ata punojnë.
Pas skandalit erdhi arrestimi i përgjegjësve, ndërsa ka reaguar edhe Konfindustira e cila kërkon ndërprerjen e fiskalizimit me detyrim. Në reagimin e saj, Konfindustria shprehet se rrjedhja e të dhënave për bizneset rrezikon falimentimin e tyre, pasi është rritur rreziku i shitjes së këtyre të dhënave te konkurrentët.
Reagimi i plotë i Konfindustria:
Konfindustria, duke vlerësuar si tëpër shqetësuese shkallën e mbrojtjes të të dhënave private nga agjensitë publike do të kërkojë zyrtarisht nga vendimarrja politike ndëprerjen me ligj dhe sa më të shpejtë të procesit të fiskalizimit me detyrim për bizneset. Për një afat të pacaktuar deri në sigurimin e standarteve të domosdoshme të sigurisë, fiskalizimi për bizneset do të kërkohet të jetë vetëm vullnetar.
Kërkesa e mësipërme vjen pas skandalit në dhjetor 2021 të rrjedhjes masive të të dhënave të ndjeshme private të qytetarëve dhe bizneseve. Konfindustria vlerëson, se ndërkohë që AKSHI dhe agjensitë e përgjegjëse të informacionit nuk janë në gjëndje të prodhojnë standartet e sigurisë për vetveten e kanë të pamundur të kontrollojnë edhe kompanitë private ndërmjetëse të fiskalizimit.
Në këtë rast rreziku i rrjedhjes dhe/ose shitjes së qëllimshme për konkurencën e të dhënave të ndjeshme tregtare të bizneseve rritet jashtëzakonisht shumë. Rrezikojnë të rrjedhin, të grabiten dhe/ose të shiten për konkurencën në formën e spiunazhit tregtar në kohë reale të dhëna shumë të ndjeshme për bizneset si: – furnitorët, – cmimet e blerjeve, – lëvizjet e shitjeve, -klientët, – cmimet e shitjeve, – xhirot, -fitimet, -borxhet, , etj.
Rrjedhja e të dhënave të mësipërme rrezikon drejtpërdrejtë humbjet financiare deri në falimentim të plotë të bizneseve, duke thelluar në mënyrë të jashtëzakonshme pasojat e skandalit të dhjetorit 2021 me pasoja të rënda në afatgjatë për gjithë ekonominë kombëtare përfshi edhe penalizime të rënda financiare në gjykata të shtetit shqiptar.
