Ministri i Brendshëm Sandër Lleshaj ka autorizuar mbajtjen e e një tenderi, që shënon skandalin e ri, pas atij të blerjes së BMW-së luksoze. Bëhet fjalë për kartat biometrike për shtetasit e huaj me leje qëndrimi në Shqipëri. Këta shtetas janë pajisur me një leje të thjeshtë, deri tani kanë mbajtur një dokument në format A4. Një kartë e shtrenjtë nuk ia vlen pasi shumica e të huajve kanë qëndrim afatshkurtër në Shqipëri. Nëse do të qëndrojnë gjatë ata duhet të aplikojnë për marrjen e shtetësisë.
Dyshimi për abuzime
Tenderi i Policisë së Shtetit me vlerë 1.4 milionë euro u anulua në datën 23 nëntor dhe është rihapur sërish një ditë më pas. Në një kohë kur buxheti i shtetit po përballet me vështirësi nga pandemia dhe fatkeqësia e tërmetit, Drejtoria e Përgjithshme e Policisë ka zgjedhur të shpenzojë për pajisjen me karta biometrike të 33 shtetasve të huaj me qëndrim në Shqipëri.
Po përse 33 mijë karta biometrike? Në Shqipëri, sipas shifrave zyrtare të INSTAT në vitin 2020 numri i të huajve me leje qëndrimi rezulton 13.507 banorë. Pse tenderohet trefishi i numrit të të huajve. Ka ndonjë informacion Lleshaj se ky numër do të trefishohet? Për ta ilustruar, në vitin 2017 numri i të huajve me leje qëndrimi në Shqipëri ka qene 12 906, pra me një ndryshim të papërfillshëm, që nuk të jep justifikim për një trefishim të numrit të tyre në vitin 2021.
Përmes kësaj procedure synohet prodhimi i 33 mijë kartave biometrike për të gjithë personat e huaj që hyjnë dhe dalin nga territori i Shqipërisë, të cilët do të pajisen me këtë dokument elektronik.
Tenderi
Drejtoria e Përgjithshme e Policisë së Shtetit në garën e rihapur ka parashikuar ndër të tjera blerjen e 10 seteve të pajisjeve të zyrave dhe lidhja me internet edhe pse ky shërbim sipas ligjeve në fuqi aktualisht ofrohet nga sektori i kufirit dhe migracionit në Policinë e Shtetit.
Ky dokument është modeli që do zëvendësojë lejen aktuale të qëndrimit e cila jepej në formatin e dokumentit A4 dhe printohej në zyrat lokale të drejtorive vendore të kufirit dhe migracionit.
Karta biometrike do të jetë e njëjtë me kartën identifikuese që përdorin shtetasit shqiptarë, por do të ketë ndryshime përsa i përket kohëzgjatjes si dhe do të përmbajë elementë të qëllimit të personit në vendin tonë.
Në dokumentet standarde të tenderit argumentohet se leja e qëndrimit e kompozuar me elementë sigurie ofron një nivel të lartë sigurie kundër kopjimit. Ky arsyetim është shumë komik, sepse në vendin tonë nuk ka ndonjë bum kërkesash për ta pasur këtë leje. Të gjitha kompanitë e interesuara do të kenë afat deri në 18 dhjetor për të dorëzuar ofertat e tyre.
/GazetaRefroma.com/
