Prej tre ditësh, pacientët me sëmundje kancerogjene në Spitalin Onkologjik të QSUT-së nuk kanë mundur të marrin trajtimin me rrezatim, një proces jetik në luftën kundër kancerit. Denoncimi i fortë vjen nga gazetari Osman Stafa, i cili përmes një reagimi në rrjetet sociale e cilëson situatën si të papranueshme dhe skandaloze.
“Dita e tretë sot, që të sëmurët me kancer nuk bëjnë rreze tek akserelator linear 2 në Spitalin Onkologjik,” shkruan gazetari Stafa, duke ngritur alarmin për një situatë që rrezikon seriozisht jetën e pacientëve.
Sipas tij, çdo ditë e humbur në trajtimin me rrezatim përbën regres të rëndë për gjendjen shëndetësore të të prekurve. Zbatimi me përpikmëri i protokollit shëndetësor është thelbësor për efektivitetin e terapisë dhe vonesat e tilla mund të çojnë në përkeqësimin e sëmundjes.
“Është skandaloze kjo situatë e frikshme me të cilën përballen të sëmurët me kancer. Mosbërja e rrezeve sipas protokollit është regres për pacientin. KJO ËSHTË ÇMENDURI. SI MUND TË TRAJTOHEN NË KËTË MËNYRË PACIENTËT QË VUAJNË NGA KANCERI?”, përfundon reagimin e tij gazetari.
Ky denoncim hedh dritë mbi një problem alarmant në sistemin shëndetësor publik, duke ngritur pikëpyetje serioze për funksionimin e pajisjeve dhe përgjegjësinë institucionale ndaj pacientëve në nevojë emergjente për trajtim.
