Disa foto dhe video intime të vajzave minorene nga Korça janë shpërndarë gjerësisht në rrjetin social “Instagram”.
Faqja, e krijuar nga persona ende të paidentifikuar, është denoncuar në polici, por hetimet nuk kanë zbuluar ende kush fshihet pas kësaj faqeje.
Megjithatë, llogaria tashmë është mbyllur. Administratori publikonte materiale intime të vajzave, duke përfshirë emrat dhe adresat e tyre.
Shpërndarja e këtyre imazheve ka dëmtuar rëndë reputacionin e vajzave, duke i bërë të ndihen të poshtëruara. Disa prej tyre kanë përjetuar tronditje të thella psikologjike, madje në disa raste është raportuar edhe vetëlëndim pas publikimit të materialeve.
Autorët e faqes anonime i kanë shantazhuar viktimat, duke u kërkuar më shumë foto dhe video, nën kërcënimin se do të publikonin ato që kishin siguruar nga burime të tjera.
Pas denoncimeve të bëra, policia ka nisur hetimet për të identifikuar përgjegjësit dhe për të gjurmuar burimin e materialeve.
