Ngjarja në Himarë po merr përmasat e një skandali të madh, i cili tregon situatën reale në rradhët e policisë. Mësohet se skafi që goditi 7-vjeçaren ditën e djeshme ka qenë në pronësi të autorit Arjan Tase, por si ka mundësi që një efektiv policie i cili paguhet 80 000 lekë të posedojë një mjet lundrues të tillë. Ky superskandal po nxjerr në dritë të palarat dhe të pathënat e Policisë së Shtetit, e cila ka toleruar një polic, i pezulluar dhe hetuar për bashkëpunim me grupet kriminale, rikthehet në radhët e policisë dhe posedon një skaf gjigand. Edhe në reagimin e Agjencisë së Mbikëqyrjes Policore, e cila shpjegoi rrethanat e ngjarjes së rëndë, nuk u dhanë detaje mbi pronësinë e skafit apo rrethanat prej të cilave ish-shefi i Policisë së Himarës, Arjan Tase e kishte marrë në përdorim. Tase deklaroi se skafi ishte i djalit të xhaxhait të tij, po në fakt u mësua se skafi ishte regjistruar në emër të një personi nga Elbasani të quajtur Adhurim Kushi., gjë që hedh poshtë dëshminë e Tases dhe ngre dyshime mbi të.
News24 raporton se në fakt, skafi ishte në pronësi të Arjan Tases, por ishte regjistruar në emër të Kushit pasi ai, një punonjës policie, me një pagë maksimumi 90 000 lekë për shkak të gradës komisar, nuk mundej që ta justifikonte financiarisht një mjet kaq të shtrenjtë.
Mësohet se Tase është bashkëpronar në biznesin e dhënies me qira të skafeve dhe mjeteve të tjera të lundrimit në zonën e Porto Palermos në Himarë.
Zbulimi i një fakti të tillë hedh edhe më tepër hije dyshimi mbi “backgroundin” e policit që vrau në mes të plazhit 7-vjeçaren dje në Potam, por edhe mbi shkaqet e vërteta të fshehjes së pronësisë së skafit nga Policia e Shtetit.
Tashmë kjo e fundit duhet të japë shpjegime mbi faktin se si mundet që një punonjës policie, me një pagë të tillë, të mund të blejë një skaf gjigant të atyre përmasave dhe a lidhet kjo pronësi me detyrën e Tases teksa drejtonte Policinë e Himarës duke toleruar grupet kriminale për të mbytur zonën me hashash.
Vlen të theksohet se Tase u pezullua nga Policia pas operacionit të madh anti-drogë në zonën e Himarës pasi dyshohej se ai kishte toleruar mbjelljen e lëndës narkotike masivisht në zonën që kishte detyrë ta ruante. Tase nuk u shpall i pafajshëm nga gjykata, por prokuroria pushoi çështjen pasi prokurori i çështjes Maksim Sota u arrestua nga SPAK për korrupsion dhe trafik droge.
Më pas, Tase u rehabilitua dhe u rikthye në Policinë e Shtetit nga vetë Gledis Nano.
