Tërmeti i fuqishëm i ditës së shtunë shkaktoi dëme të shumta materiale dhe jo vetëm.
Si pasojë e lëkundjeve të tokës, te Shkëmbi i Kavajës filluan të bien masivë gurësh.
Situata edhe ditën e sotme vijon të jetë e njëjtë, raporton “News24”.
Banorët janë në panik, pasi shkëputja e masivëve të gurëve, e cila vijon ende, mund të rrezikojë jetët e tyre.
Ata ankohen gjithashtu për ndërtimet jo cilësore në zonë.
Kjo ka bërë që pasojat e tërmeteve në 10-vjeçarin e fundit të jenë të mëdha.
“Shkëmbi ka qëndruar vetën se nuk ka pasur lagështirë, por çdo ditë vazhdon të bie, që pas rënies së tërmetit. Edhe pallati ku jetojmë ne është i çarë nga kati i parë deri në të nëntin. Është pranë shkëmbit. Asnjë nuk ka ardhur që të interesohet për këtë punë”, u shpreh banori.
Gazetari: Si e përjetuat tërmetin?
Banori: Kur ra tërmeti të gjithë njerëzit dolën jashtë. Edhe mbrëmë ishin jashtë, se është me frikë të jesh brenda. Mbrëmë ishte frika e asaj se mos bie tërmet i fortë.
Gazetari: Çfarë kërkoni?
Banori: Është shumë e frikshme të jetohet në këtë pallat, pasi ka marrë çarje nga poshtë deri lart. Ne i themi qeverisë të vijë e të marrë masa për atë pallat, të shohë gjendjen si është.
