Situata nga zjarret në Kosovë është rënduar, ndërsa mediat kosovare raportojnë se flakët kanë përfshirë tashmë edhe Bjeshkët e Nemuna.
Drejtori i Parkut Kombëtar “Bjeshkët e Nemuna”, Fatmir Morina ka thënë se zjarri është përhapur edhe në lokalitete të tjera. Ai tha se era e fortë i ka shpërndarë flakët, ndërsa shtoi se banorët nuk janë të rrezikuar. Tre shtëpi që janë më afër vatrave të zjarrit, janë evakuuar.
“Tashmë është përhap zjarri edhe në lokalitete të tjera, ky zjarr është pothuajse që 10 dite u shfaqur ndërsa ne jemi mundur ta lokalizojmë por era e madhe e cila po mbizotëron ditët e fundit është kah e shpërndan me të madhe… Banorët nuk janë të rrezikuar, tri shtëpi të cilat janë më afër vatrave të zjarrit janë evakuuar ndërsa pjesë të tjera banorëve janë më larg zjarrit”, ka thënë Morina.
Ndërkohë, togeri Drin Merturi nga FSK, tha se familjet janë evakuuar në momentin e parë që shihet rrezik për njerëzit apo dëmtim prone. Ai deklaroi se situate ditën e sotme ka qenë e rëndë për shkak të erërave, ndërsa në ndihmë ka ardhur edhe KFOR-i.
“Ka familje të cilat janë evakuuar, në momentin e parë e shohim rrezik njerëzish ose dëmtim prone atëherë ne intervenojmë dhe e bëjmë evakuimin e gjithë civilëve që gjendjen në zonën ku janë duke u përhapur vatrat e zjarrit[…]Dita e sotme ka qenë në gjendje më të rëndë për shkak të erarëve, ditët e para kemi pas intervenime dhe kemi pasur më pak vatra të zjarrit, kemi pas komunikim edhe me KFOR-in të cilët na kanë ndihmuar, ekipet tona dhe pjesëtarët të cilët e kanë bërë shuarjen e vatrave të zjarrit kanë pasur komunikim duke i dërguar koordinatat dhe KFOR-i me anë të helikopterëve ka ndihmuar me u shu zjarri”, ka thënë Merturi.
