India ka raportuar një tjetër rritje rekord rastesh ditore me koronavirus të premten. Totali i të infektuarve për të gjithë javën shkon kështu në 1.57 milionë ndërsa ritmet e vaksinimit në vend bien në mënyrë drastike nga mungesa e furnizimeve dhe problemeve të transportit.
Ndërsa vala e dytë dhe e ashpër e Covid-19 vijon të shpërndahet, numri i përgjithshëm i rasteve në vend tashmë ka shkuar në 21.49 milionë. Vatrat tashmë po përhapen nga qytetet e mbipopulluara në fshatra të largëta rurale që strehojnë gati 70% të 1.3 miliardë banorëve.
Të premten rastet ditore ishin 414,188 kurse humbjet e jetës u rritën në 3,915, duke e çuar bilancin në 234,083. Ekspertët thonë se përmasat reale të COVID-19 në Indi janë pesë deri në 10 herë më të larta se nivelet zyrtare.
Ekspertët e Shëndetit Publik, kanë ngritur shqetësimin për variantin indian të zbuluar në Mbretërinë e Bashkuar.
Autoritetet shëndetësore kanë zbuluar variantin e njohur si B.1.617.2., i cili duket se është përhapur më shumë se të tjerët në Angli.
Sipas shkencëtarëve ky variant transmetohet më shpejt se varianti i Covid që u zbulua për herë të parë në Wuhan në Kinë.
Ndërkohë variante në Afrikën e Jugut dhe në Brazil janë vlerësuar si variante me rrezik të lartë në në Mbretërinë e Bashkuar, por tashmë sëbashku me variantin Indian përhapja e infeksionit është më e shpejtë.
Besohet se më shumë se 500 raste të B.1.617.2 janë zbuluar në të gjithë Anglinë, prej të cilëve më shumë janë regjistruar në Londër.
Sakaq autoritetet shëndetësore kanë bërë me dije se vaksinat aktuale ofrojnë një shkallë mbrojtjeje nga koronavirusit, por asnjëherë nuk mund të ndalojë plotësisht të gjitha infeksionet e Covid, veçanërisht tek të moshuarit.
