Situata me zjarret nuk është aspak e mirë në Maqedoninë e Veriut. Së fundmi është raportuar se një grua nga fshati Çellopek në Komunën e Staro Nagoriçanës, fatkeqësisht ka humbur jetën për shkak të zjarreve të cilat prej ditësh kanë pushtuar vendin. Sipas informacioneve zyrtare nga autoritetet, viktima e identifikuar si Stojanka, nga paniku është mbyllur në një dhomë në shtëpinë e saj, pasi flakët përfshinë banesën.
Sjellim në vëmendje se më herët ditën e sotme, Qeveria e Maqedonisë së Veriut mori vendimin për shpalljen e gjendjes së krizës në të gjithë vendin për 30 ditë, për shkak të gjendjes alarmante të shkaktuar nga zjarret që kanë kapluar vendin gjatë ditëve të fundit, një pjesë e të cilave ende janë aktive.
“Vendimi u miratua në bazë të nevojës së shfrytëzimit racional të burimeve nacionale dhe veprimit koordinues të të gjitha institucioneve të interesuara, për shkak të paraqitjes së madhe të zjarreve dhe parandalimit të përhapjes së tyre”, bëri të ditur për Radion Evropa e Lirë, zëdhënësi i Qeverisë së Maqedonisë së Veriut, Muhamed Hoxha.
Sipas të dhënave bazë të Qendrës për Menaxhim me Kriza në Maqedoninë e Veriut, mbi dhjetë zjarre janë aktive dhe rrezikojnë seriozisht zonat e banuara, ndërkohë që situatë mbetet serioze në Komunën e Makedonski Brodit, si dhe në rajonin e Pehçevës dhe Dellçevës.
