Forca Ajrore ka intensifikuar gjatë natës monitorimin ajror të zonave të rrezikuara nga zjarret, në kuadër të masave për përballimin e emergjencës në jug të vendit.
Për këtë qëllim, është përdorur droni Bayraktar TB2, i ngritur nga Baza Ajrore e Kuçovës, i cili po transmeton në kohë reale pamje dhe të dhëna të detajuara mbi përhapjen e flakëve.
Të dhënat e mbledhura nga monitorimi ajror shërbejnë për të:
• Parandaluar përhapjen e zjarreve,
• Mundësuar një reagim të menjëhershëm nga helikopterët dhe forcat tokësore në terrenet me rrezik të lartë,
• Sinjalizuar autoritetet ligjzbatuese në rastet kur dyshohet për zjarrvënie të qëllimshme.
Sipas Ministrisë së Mbrojtjes, ky kapacitet i avancuar vëzhgimi është një element kyç në menaxhimin e situatës, duke ndihmuar në mbrojtjen e jetës së qytetarëve, pasurive dhe mjedisit natyror.
Monitorimi ajror me dronë po kryhet në mënyrë të pandërprerë, ditën dhe natën, mbi zonat më problematike të vendit, duke garantuar reagim më të shpejtë dhe koordinim më efikas mes strukturave të emergjencës.
