Mjeku imunolog, Genc Sulçebe, ka folur për situatën me pandeminë, rreth vaksinimit, si dhe imunitetit të tufës.
Kujtojmës se mjeku Sulçebe, në një bashkëpunim me Akademinë e Shkencave konstatoi se imuniteti në Tiranë nga covid-19 ka arritur deri në 48-49%, por gjithsesi ai tha se si kryeqyteti ashtu dhe Shqipëria është ende shumë larg imunitetit kolektiv të tufës që duhet të jetë 70%.
Sipas tij ky studim ka një vlerë objektiv për të vlerësuar të shkuarën, të tashmen dhe të ardhmen.
“Është realizuar me mbështetjen e Akademisë së Shkencave, që të shohim sa është shpeshtësia e antitrupave në Tiranë, në fund të qershorit dhe në fund të vitit.
Arsyeja është se prania në popullatë është një nga mjetet më objektive që pasqyrojnë si është shtrirë infeksioni në popullatë. Mënyra tjetër me tampon, kap virusin në dritare të ngushtë.
Problem është zgjedhja e kampionëve. Nëse nuk e di sa është shtrirë në popullatë, s’ke vlerësim. Është një studim që ka vlerën objektive për të vlerësuar të shkuarën, të tashmen dhe të ardhmen”, ka deklaruar Sulçebe.
Mjeku u shpreh se numri i të infektuarve është 10 herë më i lartë se ajo që matet nga tamponi.
Sipas tij në bazë të kësaj formule mendohet se në rang të përgjithshëm janë 600 mijë.
“Shpesh ngatërrohet komuniteti kolektiv dhe i tufës. Në studimin tonë, në një kampion të caktuar u pa sa është përqindja. Përqindja në Tiranë ne na doli 48-49%. Tirana ka gjysmën e rasteve të Shqipërisë.
Nëse kemi parasysh se numri i atyre që janë të infektuar, është deri në 10 herë më i lartë se ato që kap me tampon. Nëse kemi teste të kapur me teste molekulare, qoftë anti higjenik, qoftë molekular, janë kapur diku më tepër se 60 mijë.
Nëse marrim këtë formulë, në Shqipëri kemi 600 mijë të infektuar. Në Tiranë na dolën aty afër, diku tek 300 mijë. Por ama në rang të përgjithshëm, 600 mijë është 25%”, u shpreh Sulçebe./Gazetareforma.com/
Mjeku u shpreh se për t’u arritur një imunitet i plotë vetëm vaksina është zgjidhja dhe pse e pranon se rastet nuk do të zhduken plotësisht.
Sipas tij jemi 21-25%, kjo na bën të jemi larg imunitetit të tufës pasi me zhvillimin e mutacioneve të reja, përqindja duhet të jetë mbi 70%.
“Jemi akoma larg imunitetit të tufës, pasi jemi 21-25%. Sot me zhvillimin e varianteve të reja, imuniteti kolektiv duhet të jetë mbi 70%. Vaksina është mjeti më i mirë, më i shpejtë, për imunitetin kolektiv të tufës. Infeksioni nuk do zhduket, por rastet do jenë më të rralla”, tha Sulçebe.
