Teksa moti i keq ka shkaktuar dëme dhe problematika në disa qarqe të vendt kreu i Partisë Demokratike Sali Berisha, gjatë një konference për mediat në Durrës ka akuzuar drejtpërdrejt qeverinë Rama se nuk po iu vjen në ndihmë qytetarëve.
“Jam këtu për të denoncuar me forcën më të madhe, qëndrimin e papërgjegjshëm të qeverisë, e cila sillet sot si një organizatë e papërgjegjshme dhe ka lënë Shqipërinë një vend tërësisht të braktisur. Nga jugu në veri, rrugë të bllokuara, jetë të humbura, për shkak të infrastrukturës mesjetare, shembje masive për shkak të vjedhjes së fondeve në skarpate, rrënime të investimeve të bëra dhe dy vjet më parë.
Shqipëria nuk pati një mot të madh dhe nuk ishte moti i madh, fatkeqësia e saj. Fatkeqësia e vërtetë e Shqipërisë në këtë mot ishte Edi Rama dhe ministrat e tij hajdutë dhe të papërgjegjshëm për detyrën që kryejnë. U zhdukën, përveç Facebook-ut të Edi Ramës, nuk ka funksionuar asgjë”, tha kreu i PD Sali Berisha.
Kujtojmë se në disa qarqe si Kukësi, Dibra, Korça ka rënë një sasi e konsiderueshme dëbore që për pasojë ka shkaktuar bllokimin e disa akseve rrugore. Ndërsa në Shkodër dhe Lezhë ka pasur problematika me përmbytjet për shkak të reshjeve të shumta të shiut dhe hapjes së kaskadës së Drinit.
