Presidenti Ilir Meta ka bërë me dije se i ka dërguar një kërkesë për informacion ministres së Shëndetësisë Ogerta Manastirliu, pas shtrimit të rasteve me Covid-19.
“Nisur nga përkeqësimi i dukshëm i situatës së pandemisë COVID-19, me shtim të numrin të personave të infektuar, e fatkeqësisht me rritje edhe të numrit të qytetarëve të cilën kanë humbur jetën, shtrohet si domosdoshmëri një rivlerësim tërësor i situatës dhe masave të marra në raport me të, duke konsideruar edhe afrimin e stinës së ftohtë, si një tjetër faktor rëndues”, ka shkruar presidenti Meta, ndërsa ka publikuar dhe kërkesën zyrtare.
Sipas Metës, shkelja e marrëveshjes së “5 Qershorit” do ta dërgojë situatën e vendit me pandeminë drejt katastrofës shëndetësore.
“Me përshkallëzimin e krizës së rëndë politike e institucionale, veçanërisht pas shkeljes brutale e të njëanshme të Marrëveshjes konsensuale të 5 Qershorit, situata e pandemisë pritet të përkeqësohet drejt një katastrofe, që duhet parandaluar në kohë. Në këto kushte, po bëj publike letrën zyrtare që i kam dërguar ministres së Shëndetësisë, për dijeni Kryeministrit ende në detyrë dhe Kryetarit të Kuvendit”, Ilir Meta, President i Republikës”, shkruhet në kërkesën e Metës dërguar Manastirliut, Ruçit dhe Ramës./GazetaReforma.com/
