Kryetari i bashkisë së Lezhës, Pjerin Ndreu deklaroi sot se, gjendja në Lezhë pas reshjeve të shumta është përmirësuar dhe uji është tërhequr në disa zona
“Lezha, ashtu si edhe disa pjesë të tjera të Shqipërisë ka pasur problematikë të rëndë prej reshjeve të shumta”, tha ai.
Ai tha se, “gjendja është përmirësuar. Uji është tërhequr në disa zona, falë edhe ndërhyrjeve që kemi bërë ne”.
“Na është dashur të ndërhyjmë në evakuimin e disa familjeve. Kryesisht familjeve në nevojë që kanë pasur dhe shtëpi të vjetra dhe për shkak të prezencës së ujit kanë qenë në vështirësi. Dhe të paktën në Lezhë janë evakuuar rreth 27 familje”, tha Ndreu.
“Na është dashur të ndërhyjmë në një lagje të qytetit, në lagjen Varosh, ku pati një shembje masivi dhe ne u detyruam të evakuojmë gjithë familjet përreth për ta bërë zonën e sigurtë”, theksoi Ndreu.
“Pra situata në Lezhë ngelet e ngarkuar në Zadrimë, sidomos në një pjesë të Gjadrit, dhe në Grash. Është shumë e ngarkuar situata në Torovicë për momentin”, u shpreh Ndreu.
“Ne shpresojmë që për shkak të mungesës së reshjeve mos të ketë agravim të situatës, por të ketë kthim në normalitet dhe masat tona kanë qenë të menjëhershme. Mos harrojmë që kemi qenë bashkë me drejtorin e Përgjithshëm të Emergjencave ku na është dashur të ndërhyjmë me shumë shpejtësi për shkak të çarjes së dy argjinaturave. Një argjinatura e kanalitet të ujërave të larta Trashan-Rabosht që u ça dhe desh përmbyti fushën. Na u desh të hedhim mbi 500 m2 inerte aty që ta bllokojmë. Dhe argjinatura e lumit Gjadër në fshatin Grash ku shpërtheu dhe ne ndërhymë atë ditë”, tha Ndreu.
