NATO po mban praninë e saj diplomatike në Kabul dhe po ndihmon për të mbajtur aeroportin e qytetit në funksion, tha aleanca ushtarake të dielën kur kryengritësit talebanë hynë në kryeqytetin afgan. Sekretari i Përgjithshëm i NATO-s Jens Stoltenberg, tha se kjo po bëhet për të lehtësuar evakuimet, ndërsa nuk është ende e qartë nëse në aeroport ka pasur një zjarr ditën e sotme.
“NATO po ndihmon në mbajtjen e aeroportit të Kabulit të hapur për të lehtësuar dhe koordinuar evakuimet“, tha Stoltenbegr në Twitter.
Stoltenberg tha se ai kishte diskutuar situatën që po zhvillohej me shpejtësi në Afganistan, me kryeministrin britanik Boris Johnson dhe ministrat e jashtëm të Kanadasë, Danimarkës dhe Holandës.
Kryengritësit talebanë hynë të dielën në Kabul dhe thanë se ata pritet të marrin pushtetin brenda pak ditësh, ndërsa tashmë kanë marrë në kontroll edhe pallatin presidencial.
Pas gati dy dekadash, NATO këtë verë përfundoi operacionet ushtarake në Afganistan dhe tërhoqi shumicën e trupave nga vendi.
Aleanca ende operon me një përfaqësim diplomatik në Kabul. Me seli në Bruksel, NATO shërben gjithashtu si një forum për të koordinuar masat kombëtare në Afganistan, siç është evakuimi i qytetarëve që u diskutua nga ambasadorët e NATO -s që të premten.
